غزل / حافظ رحمت نيازى - كوټه

چي په بل باندې ځان وخوري تر بل جار شي

په سړيو كې هغه سړى د كار شي

موږ ليدلي دي يارانو ځينې خلك

د خپل سر سلامتي غواړي او ګار شي

د ولس درد وي را غونډ مي وي په زړه كې

چي تر خولې دباندې راشي نو اشعار شي

پروا نه لري كه كر د ګلو نه كړې
"اغزي مه كره په پښو كې به دي خار شي"

كله- كله روغ جهان وړم پر سر باندې

كله- كله دا خپل ځان راباندې بار شي

دا پر موږ ولې روڼا نه شي حافظه!
چي غرمه شي، يا ماښام شي يا سهار شي